स्तनपानाचे फायदे, अडचणी, स्तनपान कधी टाळायचे असते?

आईचे पहिले दूध हे एक रसायन असते व ते बाळाच्या पोटात जाणे आवश्यक असते. बाळाने दूध नीट ओढल्यास दूध लवकर व व्यवस्थित चालू होते.

बाटली किंवा वाटी चमच्याने दूध पाजल्यास बाळ दूध ओढण्याचे टाळू लागते. त्यामुळे पुढे आई व बाळ दोघांनाही त्रास होतो.

स्तनपानाचे फायदे :

बाळ :

– आईचे दूध बाळाच्या सवयी चे असते त्यामुळे ते कुठल्याही त्रासाशिवाय बाळाकडून स्वीकारले जाते

 – बाळासाठी सर्व आवश्यक तत्तवे दुधात असल्याने बाळाचे व्यवस्थित वजन वाढते.

-आई जो आहार, रसायने, औषधं घेते ते साररूपाने बाळाला मिळते त्यामुळे त्याची प्रतिकारशक्ती, बौद्धिक शारीरिक व मानसिक वाढ सहज व उत्तम प्रकारे होते.

-आईचे दूध बाळाला डायरेक्ट मिळत असल्याने ते खराब होणे, शिळे होणे, जंतूसंसर्ग होणे, फार गरम व थंड होणे हे प्रकार होत नाही.

– दुधाबरोबर बाळाला आईचे प्रेम मिळत असल्याने त्याला सुरक्षित वाटते.

– आईच्या दुधामुळे बाळाचे पोट व्यवस्थित साफ होते.

आई:

– बाळ जोवर फक्त आईचे दूध पिते तोवर तिला सहसा पाळी येत नाही व दरम्यान तिला परत गर्भ राहण्याची शक्यता कमी असते.

–  स्तनपानामुळे बाळंतपणानंतर गर्भाशय व्यवस्थित आकुंचन पावते व रक्तस्त्राव कमी होतो.

– ज्या माता बाळाला स्तनपान करतात त्यांना भविष्यात स्तनांचा कर्करोग होण्याची शक्यता कमी असते.